ᒪᓚᑲᐃ ᐋᕆᐊᒃ

ᓇᖕᒥᓂᖃᖅᑎ/ᑲᑎᒪᔨ

ᒪᓚᑲᐃ ᐃᓅᓚᐅᖅᑐᖅ ᑲᖏᖅᖢᒑᐱᖕᒥ, ᓄᓇᑦᑎᐊᕐᒥ ᐃᓕᓐᓂᐊᕆᐊᓚᐅᖅᓯᒪᓪᓗᓂᓗ ᑐᕆᓂᑎ ᓯᓚᑦᑐᖅᓴᕐᕕᖕᒥ ᐳᐊᑦ ᕼᐆᑉ, ᐊᓐᑎᐅᕆᐅᒥ ᐃᖃᓗᖕᓂ ᐃᓕᓐᓂᐊᕕᐊᓗᐊᓂ ᐱᔭᕇᓚᐅᖅᑳᖅᑎᓐᓇᒍ. ᑳᕈᑕᓐ ᐃᓕᓐᓂᐊᕐᕕᒡᔪᐊᖓᓃᓚᐅᖅᑐᖅ, 1984-ᒥ ᐃᖅᑲᓇᐃᔭᓕᓚᐅᖅᖢᓂ ᐊᔪᖅᓴᖅᑐᓕᕆᔨᐅᓕᖅᖢᓂ ᐃᖃᓗᖕᓂ. ᒪᓚᑲᐃ ᓄᓕᐅᖃᖅᑐᖅ ᑕᓪᓕᒪᓂᒃ ᑭᑐᕐᖓᑲᖅᖢᑎᒃ; ᒪᕐᕉᒃ ᐃᕐᓃᒃ, ᒪᕐᕉᒃ ᐸᓃᒃ, ᐊᑕᐅᓯᕐᓗ ᑎᒍᐊᖓᑦ ᐃᓗᓕᕆᓪᓗᓂᐅᒃ.

ᒪᓚᑲᐃ ᓄᓇᑖᕋᓱᐊᖅᑐᓂᒃ (ᓄᓇᕗᑦ) ᐃᓚᐅᓯᒪᔪᖅ ᐃᓕᓐᓂᐊᕇᕋᒥ ᑐᙵᕕᒃᑯᑎᒍᑦ ᓄᐃᑕᐅᓯᒪᔪᒥᒃ ᓄᓇᕗᑦ ᓯᕗᓂᒃᓴᕗᑦ−ᒥ, ᐋᑐᐋᒥ 1986−ᒥ. ᐊᔾᔨᒌᖏᑦᑐᓂᒃ ᐃᖅᑲᓇᐃᔭᖅᓯᒪᔪᖅ ᑐᙵᕕᒃᑯᓐᓄᑦ ᐊᒡᓛᑦ ᐋᔩᖅᑎᒻᒪᕆᔭᐅᓪᓗᓂ. ᖃᐅᔨᒪᓂᖃᕐᔪᐊᖅᑐᖅ ᑐᑭᓯᐅᒪᕐᔪᐊᖅᖢᓂᒋᓪᓗ ᓄᓇᑖᕋᓱᐊᕈᑏᑦ ᓄᓇᕗᒻᒧᑦ.

ᖃᖓᑐᖃᐸᓗᒃ ᐋᔩᖅᑎᒻᒪᕆᐅᓚᐅᕆᕗᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᑲᔪᓯᑎᑦᑎᑦᑎᐊᖅᓯᒪᓪᓗᓂᓗ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᑎᖏᓐᓄᓪᓗ ᐊᖏᕈᒻᒥᒃ ᑲᓇᑕᒥ ᒥᕐᖑᐃᖅᓯᕐᕕᓕᕆᔨᒃᑯᓐᓂᑦ ᐊᔪᐃᑦᑐᕐᒧᑦ, ᖁᑦᑎᖕᓂᖅᐹᖅ ᐊᒻᒪᓗ ᓯᕐᒥᓕᒃ ᒥᕐᖑᐃᖅᓯᕐᕕᖏᓐᓄᑦ.

ᒪᓚᑲᐃ ᓂᕈᐊᖅᑕᐅᓚᐅᖅᓯᒪᔪᖅ ᐊᖏᔪᖅᑳᑉ ᑐᖏᓕᐅᓄᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ ᒪᕐᕈᐊᖅᑎᖅᖢᓂ ᐱᒋᐊᖅᖢᒍ 2003. ᓄᖅᑲᓕᓚᐅᖅᑐᖅ ᑕᕝᕙᙵᑦ, ᓄᓇᕗᑦ ᐸᕐᓇᐃᔨᒃᑯᓐᓄᓪᓗ, ᕿᑭᖅᑖᓗᒃ ᑯᐊᐳᕇᓴᒃᑯᓐᓄᓪᓗ, ᕿᑭᖅᑖᓗᖕᒧᑦ ᑐᑭᒧᐊᒃᑎᔨᙳᕋᒥ ᐃᑯᐱᒃᑐᓕᕆᔨᒃᑯᓐᓄᑦ, ᑭᖑᓂᐊᒍᑦ ᑕᐃᔭᐅᕙᓕᖅᑐᖅ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ. 2006−ᒥ ᓄᖅᑲᓚᐅᖅᑐᖅ ᑐᓵᔨᐅᖃᑦᑕᓕᖅᖢᓂ ᑐᑭᓯᓇᖅᓯᑎᑦᑎᔨᐅᓕᖅᖢᓂᓗ ᐃᓐᓂᕐᕕᖕᒧᑦ ᓇᖕᒥᓂᖃᖃᑕᐅᕝᕕᒋᔭᒥᓄᑦ.

ᒫᓐᓇᐅᔪᖅ ᑐᑭᓯᓇᖅᓯᑎᑦᑎᔨᒻᒪᕆᐅᔪᖅ ᒪᓕᒐᓕᐅᕐᕕᖕᒥ ᑲᑎᒪᐅᑕᐅᕙᒃᑐᓄᑦ ᑲᑎᒪᓕᕌᖓᑕ ᑎᒥᐅᔫᑉ ᐃᓐᓂᕐᕕᐅᑉ ᑳᓐᑐᕌᕐᕕᒋᔭᖓᑦᑎᒍᑦ.