ᑐᕌᒐᖅ
ᐅᖃᐅᓯᒃᑯᑦ ᐱᔨᑦᑎᕋᕐᓗᑎᒃ ᑐᑭᓯᓇᑦᑎᐊᖁᓪᓗᒋᑦ ᑐᕌᕐᕕᐅᓇᓱᐊᖅᑐᓂᒃ ᓄᓇᓕᐅᔪᓂ.
ᐃᖅᑲᓇᐃᔭᕐᕕᐅᔪᑦ ᑲᑎᓯᑦᑎᐊᖁᓪᓗᒋᑦ ᓄᓇᓕᐅᔪᓄᑦ ᐅᖃᐅᓯᓕᕆᔨᑦᑎᐊᕙᐅᔪᑦ ᑎᓕᔭᐅᖃᑦᑕᕐᓗᑎᒃ ᐅᑎᖅᑎᖁᓪᓗᒋᑦ ᓄᓇᓕᐅᔫᑉ ᐱᕙᓪᓕᐊᓂᖓᓄᑦ.
ᖃᕋᓴᐅᔭᒃᑰᖓᔪᒃᑯᑦ, ᐅᖃᐅᓯᓂᒃ ᐊᔾᔨᒌᖏᑦᑐᓂᒃ ᐱᔨᑦᑎᕋᖁᓪᓗᒋᑦ ᐃᓚᐅᖃᑕᐅᑦᑎᐊᖁᓪᓗᒋᑦ ᑲᑎᒪᑎᑕᐅᔪᑦ.
ᑕᐅᑐᓐᖑᐊᖅᑕᖅ
ᐃᖅᑲᓇᐃᔭᕐᕕᑦ ᐊᔪᕆᖅᓲᒪᓗᒋᑦ ᐃᓄᐃᑦ ᓄᓇᓕᖏᓐᓄᑦ ᖃᓄᐃᓕᐅᕋᔭᕐᓂᖏᓐᓂᒃ ᑐᑭᓯᑎᑦᑎᑦᑎᐊᕋᓱᖁᓪᓗᒋᑦ ᐅᖃᐅᓯᖏᑎᒍᑦ ᐊᒡᕕᐊᕈᑎᖃᖏᓪᓗᑎᒃ ᐅᖃᐅᓯᒃᑯᑦ ᐃᓕᖅᑯᓯᒃᑯᓪᓘᓐᓃᑦ.
ᑐᙵᕕᕗᑦ
ᐅᖃᐅᓯᖏᑎᒍᑦ ᑕᑯᒃᓴᕈᖅᐸᓪᓕᐊᔪᑦ ᒪᓕᒃᐸᓪᓕᐊᓗᒋᑦ ᓄᓇᕘᑉ ᓄᓇᓕᖏᓐᓂ ᐊᒻᒪᓗ ᓄᓇᕐᔪᐊᑉ ᑲᔾᔨᕐᒥᐅᖏᓐᓄᑦ.
ᑐᓴᐅᒪᔾᔪᑎᒃᑲᓐᓃᑦ
ᐃᓐᓂᕐᕕᒃ ᐃᑲᔪᖅᑏᑦ ᑎᒥᖓᑦ ᐃᓄᐃᓐᓇᕐᓄᑦ ᓇᖕᒥᓂᕆᔭᐅᔪᖅ ᐊᐅᓚᑕᐅᓪᓗᓂᓗ ᐃᖃᓗᖕᓂ, ᓄᓇᕗᒥ. ᐃᓐᓂᕐᕕᒃ 1997−ᒥ ᐱᒋᐊᓚᐅᖅᑐᖅ ᑭᖑᓂᐊᒍᓪᓗ ᐊᑕᐅᓯᓐᖑᖅᑎᑕᐅᓯᒪᓪᓗᓂ ᓄᓇᕗᑦ ᑐᓵᕘ−ᓚᐅᖅᓯᒪᔪᒥᑦ 2003−ᒥᓂ. ᒫᓐᓇᐅᔪᖅ ᐃᓐᓂᕐᕕᒃ ᐱᔨᑦᑎᕋᐅᑎᖃᓗᐊᖅᑐᖅ ᑐᓵᔨᐅᓂᕐᒥᒃ, ᓂᐱᖅᑯᖅᑐᔾᔪᑎᓂᒃ ᐊᑐᖅᑐᐊᖅᑎᑦᑎᔨᐅᓪᓗᑎᒃ ᓂᐅᕐᕈᑎᖃᓲᖑᓪᓗᑎᒃ, ᐃᓄᒃᑎᑑᓕᕆᔨᐅᓪᓗᑎᒃ ᐊᔨᖏᓐᓄᓪᓗ ᐅᖃᐅᓯᕐᓄᑦ, ᓇᕿᑦᑕᖅᑎᐅᓪᓗᑎᒡᓗ, ᑲᑎᒪᕝᕕᐅᔪᓐᓇᖅᖢᑎᒃ, ᐅᓄᖅᓯᑎᑦᑎᕙᒃᖢᑎᒡᓗ.
ᐃᓐᓂᕐᕕᖕᒥ ᐃᖅᑲᓇᐃᔭᖅᑎᐅᔪᑦ ᐊᖏᔪᖅᑳᖅ/ᓇᖕᒥᓂᖃᖅᑎᐅᓪᓗᐊᑕᐅᓪᓗᓂ ᕉᑕ ᑲᓂᖕᕼᐋᒻ, ᐊᐅᓚᑦᑎᔨ ᐊᒡᓚᒡᕕᖕᒥ ᑯᕆᔅᑏᓇ ᓯᑑᓂ, ᐊᐅᓚᑦᑎᔨ ᐅᐊᔭᒨᖅᑐᓄᑦ ᔪᐊᔾ ᒥᑦᑐᖅ, ᑎᑎᕋᕐᕕᖕᒥ ᑲᒪᔨ ᐋᓕᒃᓵᓐᑐᕋ ᑲᓂᖕᕼᐋᒻ, ᐊᒻᒪᓗ ᑎᓴᒪᑦ ᑲᑎᒪᔪᓄᑦ ᐃᑲᔪᖅᑎᐅᕙᒃᑐᑦ ᔫᓯᐱ ᕼᐋᓚᓐ, ᐃᓚᐃᓇ ᑰᐳ, ᕋᐃᔭᓐ ᑕᖃᐅᒐᖅ, ᐊᒻᒪᓗ ᐄᓱ ᒪᑉᓕᒃ. ᓄᓇᕗᒻᒥᐅᑕᐅᔪᓕᒫᑦ.
ᐱᔨᑦᑎᕋᖅᑕᐅᔪᑦ ᐅᓄᕐᓂᖃᒐᔪᒃᑐᑦ 300−ᒥ 500−ᓄᑦ ᑕᒫᓐᖓᑦ ᐅᑭᐅᖅᑕᖅᑐᒦᙶᖅᑐᑦ ᑲᓇᑕᓕᒫᐸᓗᖕᒥᓪᓗ ᑕᕆᐅᓪᓗ ᐊᑭᐊᖓᓂᕐᒥᐅᖑᔪᓂᒃ. ᐃᑭᐊᖅᑭᕕᒃᑯᑦ ᐊᔪᕐᓇᖏᓐᓂᖅᓴᐅᓂᖓᓄᑦ ᓇᑭᑐᐃᓐᓇᖅ ᐱᔨᑦᑎᕋᕈᓐᓇᖅᑐᑦ. ᓇᖕᒥᓂᖅᓱᖅᑐᑦ ᑎᓕᔭᐅᓲᑦ ᐅᖃᐃᓯᕐᓄᑦ ᐱᔨᑦᑎᕋᕆᐊᖃᖅᑐᖃᕌᖓᑦ ᑐᓵᔨᐅᓂᕐᒧᑦ, ᑐᑭᓯᓇᖅᓯᑎᑦᑎᓂᕐᒧᑦ, ᓇᕿᑦᑕᕐᓂᕐᒧᓪᓗ. ᐅᖃᐅᓯᕐᓄᑦ ᐱᔨᑦᑎᕋᐅᑏᑦ ᐱᖓᓱᓅᖓᔪᑦ ᐃᓕᓴᕆᔭᐅᓯᒪᔪᓄᑦ ᐃᓄᒃᑐᑦ, ᐅᐊᕖᑎᑐᑦ, ᖃᓪᓗᓈᑎᑐᓪᓗ.
ᐊᑐᖅᑐᐊᒐᐃᑦ ᓂᐅᕐᕈᑎᐅᓲᓪᓗ ᑐᓵᔨᐅᔾᔪᑏᑦ ᐊᑐᖅᑕᐅᔪᓐᓇᖅᑐᑦ ᑲᑎᒪᔪᓄᑦ ᐊᑲᐅᔪᑦ ᐃᓄᑭᑦᑐᓄᑦ ᐃᓄᒋᐊᒃᑐᓄᓪᓗ ᑲᑎᒪᕐᔪᐊᖅᑐᓄᑦ. ᑐᓵᔾᔪᑏᑦ ᐊᓯᔾᔨᖅᑕᕈᓐᓇᖅᑐᑦ ᓈᓚᐅᑎᑐᑦ ᐅᖃᐅᓯᓄᖅ ᐊᔾᔨᒌᖏᑦᑐᓄᑦ. ᑕᕐᕆᔭᖅᑐᖃᕈᓐᓇᕆᕗᖅ ᐊᖏᓂᖃᖅᑐᖅ 10−ᒥ 6−ᒧᑦ ᐃᓯᒐᓪᓗᐊᓄᑦ ᐃᓄᒋᐊᒃᑐᓄᑦ ᐊᑲᐅᔪᖅ. ᑕᕐᕆᔭᒐᒃᓴᓕᐊᕆᔭᐅᔪᓐᓇᕆᕗᑦ ᑲᑎᒪᔪᑦ.
ᐃᓕᓴᕆᔭᐅᓯᒪᔪᑦ
· ᑐᓂᔭᐅᓯᒪᔪᑦ ᐊᕐᕌᒍᒧᑦ ᓇᖕᒥᓂᖃᑦᑎᐊᕐᓂᐹᖑᓂᕐᒧᑦ ᓄᓇᕗᒥ ᓇᖕᒥᓂᖃᖅᑏᑦ ᑕᑯᒃᓴᐅᑎᑦᑎᑎᓪᓗᒋᑦ 2000−ᒥ
· 2012−ᒧᑦ ᓂᕈᐊᒐᒃᓴᙳᖅᑎᑕᐅᓯᒪᔪᖅ ᓄᓇᖃᖅᑳᖅᑐᓄᑦ ᓇᖕᒥᓂᕆᔭᐅᔪᓄᑦ ᐱᒋᐊᖅᑎᑕᐅᔪᖅ ᐅᖃᓕᒫᒐᓕᐅᖅᑎᓂᒃ ᓇᖕᒥᓂᖃᖅᑎᓅᖓᔪᓄᑦ
· 2013−ᒥ ᓂᕈᐊᒐᒃᓴᙳᖅᑎᑕᐅᓚᐅᖅᑐᑦ ᐅᖃᐅᓯᕐᓄᑦ ᐃᓕᓴᖅᓯᓂᕐᒧᑦ ᐊᕐᕌᒍᑕᒫᑦ ᑐᓂᔭᐅᕙᒃᑐᖅ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᒃᑯᓐᓂᒃ
